الرئيسية / ثقافة أدب وفنون / أقلام و آراء / عروب صبح: “اللي بعده”

عروب صبح: “اللي بعده”

– حوار خيالي من خارج درب التبانة –
طلعت الزغاريد من بيت أبو رجائي ….
لولولولولولولولو لييييش
خير يام أم رجائي صرخت أم بشير …Aroub_soubh_عروب صبح

لم تلحق أن تنهي حرف الراء واذا بزغرودة ثانية من دار ابو مكرم وثالثة من دار ابو مثنى تمخر عباب فضاء الحي حتى أنها لم تعد تعرف مصدر الفرح
ثمان وعشرون بيت علت منهم الزغاريد فجأة!
ودخلت مسرعة شارع الحي سيارات الكنافة في مشهد مهيب تقشعر له الابدان ..
ركضت الى الداخل واذا بأبو بشير يستمع الى نشرة الأخبار!
: مش سامع ؟
أشار لها أن تصمت لأنه يتابع أمرا جللا
: قوم شوف شو القصة معقول كل بنات الجيران انطلبوا بنفس اليوم ؟!
: أعلنوا التشكيلة
برمت أم بشير فمها : شفتهم عالفيس قبل شوي !!! بعد عشر أيام هذا اللي قدروا عليه!؟
أبو بشير: أي أعطيه فرصة يا أم بشير هذا زلمة محترم

خرج بشير ورأسه ينقط ماء بعد حمام بارد : صاحب النا طلع بالتشكيلة
: عقبالك يما يا حبيبي، نظرت لزوجها بطرف عينها وأكملت : مشان هيك كنت بقلك روح عالدوار بكير يما … شفت لو خليته يطلع من غير ما يفتح الدكان ان كان صار وزير وللا شي مدير!
: يما انت الثانية زي الطابور الخامس صايرة فكك من هالحكي الزلمة شب محترم، بكفينا ختيارية!
: يما كله مكتوب عالفيس وعالوتس حتى جارتنا خالتك ام خالد حكتلي …
: شو دخل ام خالد؟
: والله يما انك غشيم
: غشيم غشيم تعي يا هنادي شوفي أمك بتقول لي غشيم !

هنادي التي كانت تحضر الشاي وتستمع للحديث : على هيك هلأ صار الوقت مناسب نجيب كلب يُمة ؟
: شو كلب والله بتركلكم البيت
: مش بدك أصير وزيرة؟
جحرت أم بشير إبنتها ودخلت لغرفتها وهي تتمتم : الله يلعن هيك ترباية
تململ أبو بشير ونقل على البيين ليتابع كأس العالم …
: ها يابا مين بيلعب اليوم كيف النتائج لهسة؟
: والله يابا ما احنا عارفين شو اللي عم بيصير إن كان بالبلد وللا بكأس العالم!
الوجود في المنافسة لا يعني أنك قدها ومع إنك وصلت بس واضح إنه ممكن يجيك خماسي على سحنتك حتى تعرف حجمك الحقيقي!
المدربين على نفس النهج من وين بدك الفريق يربح؟
: يابا انت متشائم؟
: يابا أنا متفائل بالوقت الإضافي

عروب صبح
20/06/2018
مونت كارلو الدولية

(Visited 7 times, 1 visits today)

شاهد أيضاً

بسام غراوي .. وداعاً

بسام غراوي .. وداعاً

Bassam Ghraoui .. Adieu. أحدى مجموعات طوابع سوريا شاهدة على عظمة شوكولا غراوي، فالمجموعة صدرت …